×

Notice

Please enter your DISQUS subdomain in order to use the 'Disqus Comments (for Joomla)' plugin. If you don't have a DISQUS account, register for one here

கருத்துச் சுதந்திரப் போர்வையில் தேச விரோத நாடகம்

Friday, 14 March 2014 00:00 Written by  font size decrease font size decrease font size increase font size increase font size

 

ஏறக்குறைய ஆயிரம் ஆண்டுகள் அன்னியரின் ஆக்கிரமிப்பில் அவதிப்பட்டுக் கொண்டிருந்த பாரதம், சுதந்திரம் அடைந்த பின்னும் ஆங்கிலேயர் அமைத்துக்கொடுத்த அடிப்படை அரசாட்சிக் கோட்பாடுகளையும் திட்டங்களையுமே பல தளங்களிலும் தொடர்ந்தது. உதாரணத்திற்கு அரசியல் அமைப்புச் சட்டம், கல்வித்திட்டம் போன்றவற்றைச் சொல்லலாம். போதாத குறைக்கு, மேற்கத்திய மதச்சார்பின்மை கோட்பாடு வேறு பாரதத்தின் தலையில் தூக்கி வைக்கப்பட்டது.

 

நேருவின் சோஷலிஸ மற்றும் மதச்சார்பின்மைக் கொள்கைகளினால் இடதுசாரிக் கோட்பாடுகளின் தாக்கம் ஆட்சி அமைப்பிலும் கல்வித்திட்டங்களிலும் ஏற்பட்டது. அதுவே தொடர்ந்து வந்த காங்கிரஸ் ஆட்சிகளில் 50 ஆண்டுகளுக்கும் மேலாக கடைப்பிடிக்கப்பட்டு வருகிறது.

 

இதன் விளைவாக பாரதத்திற்கு எதிராகவும், அதன் தேசியம், ஆன்மீக மரபு மற்றும் கலாச்சாரப் பாரம்பரியத்திற்கு எதிராகவும் யார் வேண்டுமானாலும் என்ன வேண்டுமனாலும் பேசலாம், எழுதலாம் என்கிற போக்கு வளர்ச்சி அடைந்து வந்துள்ளது. இதற்கு மேற்கத்தியக் கோட்பாடுகளான கருத்துச் சுதந்திரம், படைப்புச் சுதந்திரம், மனித உரிமை, மதச்சார்பின்மை, பன்முகக் கலாச்சாரம் போன்ற போர்வைகளைப் பயன்படுத்தும் போக்கும் அதிகரித்து வருகிறது. இந்தப் போக்கைக் கண்டித்து அதற்கு எதிராக தேசப்பற்றுடன் போராடுபவர்களை ”ஹிந்து தாலிபான்கள்” “காவி தீவிரவாதிகள்” என்று முத்திரைக் குத்தப்படுவதும் தொடர்கிறது.

 

சமீபத்தில் சென்னையில் நடந்த ஒரு சம்பவம் இவ்வுண்மையை உணர்த்துவதாக இருக்கிறது.

 

“அலி ஜெ” (Ali J) என்னும் தேச விரோத நாடகம்

Karuthu-Suthanthira-Porvaiyil-Dhesa-Virotha-Natakam-1

சென்னையில் (Evam Theaters) என்னும் ஒரு நாடகக்குழு இயங்கி வருகிறது. இது 2003-ல் சுனில் விஷ்ணு, கார்த்திக் குமார் ஆகிய இளைஞர்களால் தொடங்கப்பட்டது. இவர்களுடைய நாடகங்கள் வாஷிங்டன், லண்டன் போன்ற வெளிநாட்டு நகரங்களிலும் அரங்கேறியுள்ளன. சமீபத்தில் இவர்கள் உருவாக்கிய நாடகத்தின் பெயர் “அலி ஜெ”. இது எடின்பர்க் விழாவில் அரங்கேற்றப்பட்டுள்ளது.

 

இந்த நாடகம் ”அரசியல் உணர்வார்வ நாடகம்” (Political Thriller) என்று விளம்பரப்படுத்தப்பட்டுள்ளது. இந்த நாடகத்தின் கதாநாயகன் அலி ஜெ தூக்குத் தண்டனையை எதிர்நோக்கும் குற்றவாளியாகவும் கடைசியில் விடுதலைப் பெறுபவனாகவும் காட்டப்படுகிறான். இதில் முக்கியமாக மூன்று கதாபாத்திரங்களாக அலி ஜெ, மோகன் மற்றும் பாரதி முன்னிறுத்தப்படுகிறார்கள். இதில் அலி ஜெ என்கிற கதாபாத்திரம் பாரதத்தின் பிரிவினைக்குக் காரணகர்த்தாவாக இருந்தவர்களில் முதன்மையானவரான முன்னாள் பாகிஸ்தான் அதிபர் முகம்மது அலி ஜின்னாவையும், மோகன் என்கிற கதாபாத்திரம் தேசத்தந்தை மஹாத்மா காந்தியையும், பாரதி என்கிற பெண் கதாபாத்திரம் பாரத தேசத்தையும் உருவகப்படுத்துகின்றன.

 

சில காட்சிகளும் வசனங்களும்

காட்சி: 3

Karuthu-Suthanthira-Porvaiyil-Dhesa-Virotha-Natakam-4

”இன்று என் சகோதரி ஃபாத்திமா வந்து என்னைச் சந்திக்கும் நாள்” என்று அலி ஜெ ஒரு வசனம் பேசுகிறார்.

 

முகம்மது அலி ஜின்னாவின் சகோதரி ஃபாத்திமாவைக் குறிப்பதாக உள்ளது இந்த வசனம்.

 

காட்சி: 6

Karuthu-Suthanthira-Porvaiyil-Dhesa-Virotha-Natakam-3

 

 

மோகன் வழுக்கைத்தலையராகவும், சற்றே மெலிதான உடல் கொண்டவராகவும், கண்ணாடி அணிந்தவராகவும் இருப்பார் என்று காந்தியை உருவகப்படுத்திவிட்டு,

 

“மோகன் பேச எழுந்தபோது அவர் சொன்ன முதல் விஷயம், ‘அசீம் அலி போன்ற ஒரு முஸ்லிம் கூட ஒரு குழுவின் தலைவராக இருக்கும் இந்தியாவிற்கு நான் திரும்பி வந்தது நல்லது’ என்பதுதான்”

 

என்று வசனம் பேசுகிறார் அலி ஜெ. இந்த வசனத்தைப் பேசும்போது, காந்தி முஸ்லிம்களை எகத்தாளம் செய்தது போலத் தோன்றும் விதமாகப் பேசுகிறார். இது காந்தியை அவமதிப்பதாக உள்ளது.

 

காட்சி: 8

Karuthu-Suthanthira-Porvaiyil-Dhesa-Virotha-Natakam-5

“அவருடைய தர்மம், கர்மா, அஹிம்சை போன்ற பேச்சுக்களையும், மதவாதப் போர்வை கொண்டுள்ள அவருடைய அகமகிழ்வு தன்னிறைவு ஆகிய குணங்களையும் அறைய வேண்டும் என்கிற வேகம் என்னுள் ஏற்படுகிறது” என்று வசனம் பேசுகிறார் அலி ஜெ.

 

அதாவது ஜின்னா காந்தியின் பேச்சுக்களுக்காக அவரை அவமதித்துப் பின்னர் அறைய விரும்புவதாக காட்டப்படுகிறது.

 

காட்சி: 9

”நானோ, முஸ்லிமோ, இந்தியனோ, பாகிஸ்தானியோ, பால்காரனோ, எவனோ, பன்றிக்கறி சாப்பிட முடியாது என்று யார் சொன்னது? அதனால, என் வாயில் பன்றி மாமிசத்தைப் போட்டுக்கொள்ளும் அளவிற்கு தைரியத்தை வரவழைத்துக்கொண்டேன். அந்த மாமிசத்தை மென்று விழுங்கினேன். ஆஹா… என்னே அதன் காந்தலுடன் கூடிய உவர்ப்பான திடமான சுவை!”

 

மேற்கண்ட வசனத்தின் மூலம் முஸ்லிம்களின் மதவுணர்வையும் அவமதித்திருக்கிறார்கள் நாடகக் குழுவினர்.

 

காட்சி 10:

”ஹிந்துக்கள் ஆயிரக்கணக்கான அப்பாவி முஸ்லிம்களைப் பழிவாங்கியபோது குஜராத் அரசு மௌனம் சாதித்தது. என் சகப்பணியாளனின் சகோதரியை ஹிந்துக்கள் கூட்டு வன்புணர்வு செய்தார்கள்; ஒருவன் பெண்களையும் குழந்தைகளையும் தெருக்கோடி வரைத் துரத்திச் சென்று அவர்கள் தலைகளை வாளால் அறுத்தெறிந்தான்.”

 

மேற்கண்ட வசனத்தின் மூலம் ஹிந்துக்களை மதவெறியர்களாகக் காட்டுகிறார்கள்.

 

”சென்ற வாரம்தான் பாபு பஜ்ரங்கி தலைகளைக் கொய்தவாறு தெருக்களில் சுற்றித் திரிந்தான்” என்கிற வசனத்தின் மூலம் பாபு பஜ்ரங்கி என்கிற விசுவ ஹிந்து பரிஷத் தலைவரை அவமதிக்கிறார்கள்.

 

அஜ்மல் கசாப்பைத் தூக்கிலிட்ட பணியைச் செய்த மகாதேவ் மாலிக் என்பவரை அவமதிக்கும் விதமாக, “அவனுக்குத் துணிவைப் பற்றி என்ன தெரியும்? அவனை தூக்கிலிடுபவர்களுக்குத்தானே துணிவும் தைரியமும் தேவை?” என்கிற வசனம் பேசப்படுகிறது.

 

காட்சி: 11

”நான் ஒரு இஸ்லாமிய அடிப்படைவாதி; நான் ஜிகாதிகளுக்காக குண்டு தயாரித்து கொடுக்கிறேன் என்று என்னிடம் சொல்கிறார்கள். நான் லண்டனில் சிலவற்றைக் கற்றுக்கொண்டேன். என் மேல் குறைந்த பக்ஷ சந்தேகம் கூட வரக்கூடாது என்பதற்காக சென்னையில் ஒரு கால் செண்டரில் வேலைக்குச் சேர்ந்தேன். நான் என் குடும்பத்துடன் தொடர்பில் இல்லை என்பது வெளிப்படை; ஏனென்றால் இந்த மாதிரியான ஆட்கள் அப்படித்தான் வாழ்கிறார்கள்” என்கிற இந்த வசனம் காவல்துறை அனைத்து முஸ்லிம்களையும் அந்த மாதிரியான கண்ணோட்டத்துடன்தான் பார்க்கிறார்கள் என்கிற மாதிரிப் பேசப்படுகிறது.

 

காட்சி: 12

”ஆட்டுக்கறி திங்கற முஸ்லிம்கள்; அசுத்தமடைந்த அசிங்கங்கள்; அழுக்கான குடிசைவாசிகள்; உன் மேல் கை வைக்க முயலும் எந்த ஒரு நாற்றம் பிடித்த முஸ்லிமையும் கொன்று போடுவேன் என்று ஒருவன் கூச்சல் போட்டதைக் கேட்டேன். பின்னர் அவன் என் முகத்தில் துப்பினான்.”

 

மேற்கண்ட வசனத்தின் மூலம் பாரதியின் தந்தையை ஒரு உயர்ஜாதி மேட்டிமைவாதியாகவும் முஸ்லிம்களை அவமதிக்கும் மத வெறியராகவும் காண்பிக்கிறார்கள்.

 

காட்சி 13:

”இந்தியாவில் ஒருவன் தன்னுடைய அப்பாவித்தனத்தை நிரூபிக்கின்றவரை அவன் ஒரு குற்றவாளியே” என்கிற வசனத்தின் மூலம் இந்திய நீதித்துறையை அவமதிக்கிறார்கள்.

 

காட்சி: 16

”செய்ய வேண்டிய வேலைகள் இருக்கின்றன; வீரர்கள் வேண்டும்; சொற்பொழிவுகள் நிகழ்த்தப்படவேண்டும்; இவ்வுலகத்தில் நிலையான காலடிக்கும், சுதந்திரக் குரலுக்கும் கஷ்டப்பட்டுக் கொண்டிருக்கும் ஒரு தேசத்தின் அங்கம் நான்.”

 

மேற்கண்ட வசனம் தெளிவாக முகம்மது அலி ஜின்னாவையும் அவருடைய மனப்பான்மையையும் முன்னிறுத்துகிறது.

 

காட்சி: 17

”மோகனுக்கும் பாரதிக்கும் இடையே நின்றுகொண்டிருக்கும் 10 வயது சிறுவன் என்னைப் போலவே இருப்பதாக ஃபாத்திமா சொன்னாள். அது எனக்கு வியப்பாக இல்லை. அதனால்தான் அந்தப் பெண் திருமணம் செய்துகொள்ள அவசரப்பட்டாளா? ஒரு குழந்தைக்கு ஒரு அம்மாவும் இரண்டு தகப்பன்களும் இருக்க முடியுமா? அந்தப் பெண் முதலில் கைப்பிடிப்பவன் கதாநாயகனா, அல்லது, அந்தப் பெண்ணை முதலில் அடைபவன் கதாநாயகனா?”

 

மேற்கண்ட வசனத்தின் மூலம் பாரதி மோகனைத் திருமணம் செய்வதற்கு முன்பே அலி அவளை அடைந்து அவளுடன் உடலுறவு கொண்டுவிட்டான் என்பதாகவும் அந்தப் பத்து வயது சிறுவன் அலியுடைய மகன் என்பதாகவும் காட்டப்படுகிறது. அதாவது பாரதி (இந்தியா) மோகனுக்கு (மோகந்தாஸ் கரம்சந்த் காந்திக்கு) கிடைப்பதற்கு முன்னாலேயே அலி ஜெவால் (ஜின்னாவால்) கெடுக்கப்பட்டுள்ளது என்று இந்தக் காட்சி மூலம் நிறுவப்படுகிறது.

 

இந்தக் காட்சிக்குப் பின்னர் “ஜின்னா தோல்வியுற்றார்; ஆனால் காந்தியும் வெற்றி பெறவில்லை” என்கிற குரல் மட்டும் பின்னணியில் ஒலிக்கிறது.

 

அரசியல் அமைப்புச் சட்டம் என்ன சொல்கிறது?

 

நமது அரசியல் அமைப்புச் சட்டத்தின் 19வது க்ஷரத்து பேச்சு மற்றும் கருத்துச் சுதந்திரத்தை வரையறை செய்கிறது. அதன் படி…

 

“அங்கீகரிக்கப்பட்டுள்ள பேச்சு மற்றும் கருத்துச் சுதந்திரமானது, நடைமுறையில் இருக்கின்ற எந்த சட்டத்தையும் பாதிக்காதவாறு இருக்க வேண்டும். இந்திய இறையாண்மை மற்றும் ஒருமைப்பாடு, தேசப் பாதுகாப்பு, வெளிநாடுகளுடனான நட்புறவு, பொதுநலன், நற்பண்பு, நற்குணம், நீதிமன்ற அவமதிப்பு, குற்றம் செய்யத்தூண்டுதல், அவதூறு போன்றவற்றைக் கட்டுப்படுத்தும் விதமாக அரசு கொண்டு வர விரும்பும் எந்தவிதமான சட்டத்தையும் தவிர்க்காதவாறும் இருக்க வேண்டும்.”

 

சுதந்திரம் என்பது எப்போதும் முழுமையாக இருக்கக்கூடாது. அவ்வாறு முழுமையாக அளிக்கப்படும் சுதந்திரமானது எந்த ஒரு ஜனநாயகத்திற்கும் கேடு விளைவிக்கும் என்பதில் சந்தேகமில்லை. அதற்காகத்தான் நமது அரசியல் சாஸன மன்றம் (Constituent Assembly) பலநாட்கள் விவாதித்துத் தயாரித்த அரசியல் அமைப்புச் சட்டத்தில் பேச்சுச் சுதந்திரத்திற்கும் கருத்துச் சுதந்திரத்திற்கும் மேற்கண்ட கட்டுப்பாடுகளை விதித்துள்ளனர். பல ஜாதிகள், மதங்கள், மொழி மற்றும் பண்பாட்டுக் குழுமங்கள் கொண்ட நாடாக இந்தியா விளங்குவதால் நாட்டின் ஒருமைப்பாட்டுக்கும் இறையாண்மைக்கும் பங்கம் நேராமல் இருக்கச் சிலக் கட்டுப்பாடுகள் விதிக்க வேண்டியது அவசியம். அதன்படியே நம் முன்னாள் அரசியல் தலைவர்கள் சட்ட திட்டங்களை வகுத்துள்ளனர்.

 

எனவே, மேற்கூறப்பட்ட அரசியல் அமைப்புச் சட்டத்தின் விதிகள் படி, இந்த நாடகத்தின் 17-ம் காட்சி மட்டுமே அதைத் தடை செய்யப் போதுமானது. மேலும் இதில் கவனிக்க வேண்டிய மற்றொரு முக்கியமான விஷயம், மேற்கூறப்பட்டதைப் போன்ற காட்சிகளும் வசனங்களும் இந்திய தண்டனைச் சட்டத்தின் பல பிரிவுகளை மீறுவதாக இருக்கிறது. அதாவது இந்திய தண்டனைச் சட்டத்தின் 295A, 153A, 499, 124A பிரிவுகளின் கீழும், தேசத்துரோகத்தின் கீழும் இந்த நாடகக் குழுவினரின் மீது மாநில மத்திய அரசுகள் தகுந்த நடவடிக்கை எடுக்கவேண்டியதும் அவசியமாகும்.

 

பெங்களூரில் அரங்கேற்றம்

கடந்த ஜனவரி 31 மற்றும் ஃபிப்ரவரி 1 ஆகிய தினங்களில் இந்த நாடகம் பெங்களூரு ஜே.பி நகரில் உள்ள ரங்கஷங்கரா என்கிற அரங்கில் நடத்தப்பட்டது. ஹிந்து ஜனஜாக்ருதி அமைப்பைச் சேர்ந்தவர்கள் பெங்களூரு நகரக் காவல்துறையினரிடம் புகார் அளித்தும், ஜனநாயக முறையில் ஆர்பாட்டங்கள் நடத்தியும், கர்நாடக காங்கிரஸ் அரசும் நகரக் காவல்துறையும் அந்நாடகக் குழுவிற்குப் பாதுகாப்பு அளித்து நாடகம் அரங்கேற உதவியுள்ளன. இந்தியாவில் இந்தியாவிற்கு எதிரான ஒரு தேச விரோத நாடகத்தை அரங்கேற்ற ஒரு இந்திய மாநில அரசே உதவியுள்ளது, இந்திய ஜனநாயகத்தில் அழிக்கமுடியாத கரையாகப் படிந்துவிட்டது மிகவும் துரதிர்ஷ்டவசமானது.

 

மும்பையில் தடை

பெங்களூருவுக்கு அடுத்தபடியாக மும்பை நகரில் கலா கோதா சங்கத்தின் விழாவில் இந்நாடகத்தை அரங்கேற்ற ஏற்பாடு செய்யப்பட்டிருந்தது. ஃபிப்ரவரி 6ம் தேதி “House of Tales” என்கிற இடத்தில் நடத்தவிருப்பதாக விளம்பரங்கள் செய்யப்பட்டு டிக்கட் விற்பனையும் நடந்திருந்தது.

 

மும்பையிலும் ஹிந்து ஜனஜாக்ருதி சமிதி அமைப்பினர் தங்கள் எதிர்ப்பை மிகவும் பலமாகப் பதிவு செய்தனர். ஆர்பாட்டங்களும் நடத்தினர். அவர்களுடைய புகாரை ஏற்றுக்கொண்ட மும்பை நகரக் காவல்துறை நாடகத்தைத் தடை செய்து, அரங்கேற்ற வேண்டாமென்று கலா கோதா சங்கத்தை அறிவுறுத்தியது.

 

சென்னையிலும் எதிர்ப்பு; காவல்துறை தடை

Karuthu-Suthanthira-Porvaiyil-Dhesa-Virotha-Natakam-6

 

சென்னையில் கல்லூரிச் சாலையில் உள்ள ”Alliance Francais” என்கிற அரங்கில் கடந்த 9.03.2014 ஞாயிற்றுக்கிழமையன்று இந்நாடகம் அரங்கேற்றப்படுவதாக விளம்பரம் செய்யப்பட்டு டிக்கட்டுகளும் விற்பனை செய்யப்பட்டன. 6ம் தேதி வியாழனன்று ஹிந்து முன்னணி அமைப்பினர் சென்னை நகரச் செயலர் திருநாவுக்கரசு இளங்கோ தலைமையில் சென்னை மாநகரக் காவல்துறை ஆணையரிடம் இந்த தேச விரோத நாடகத்தை நடத்தத் தடை விதிக்க வேண்டுமென்று புகார் மனு கொடுத்தனர். அதனைத் தொடர்ந்து ஹிந்து ஜனஜாக்ருதி அமைப்பைச் சேர்ந்த திருமதி உமா ரவிச்சந்திரன் அவர்களும், திருமதி உமா ஆனந்தன் மற்றும் திருமதி ராதா ராஜன் ஆகிய சமூக ஆர்வலர்களும் சென்னை மாநகரக் காவல்துறை ஆணையருக்குப் புகார்கடிதம் அளித்தனர்.

 

அவர்கள் நுங்கம்பாக்கம் காவல்நிலையத்திற்கும் சென்று காவல்துறை ஆய்வாளரையும் சந்தித்தனர். நாடகத்தில் எவ்வாறெல்லாம் தேச விரோத காட்சிகள் இடம்பெற்றுளன என்பதை ஆய்வாளரிடம் விளக்கினர். நாடகத் தயாரிப்பாளரான ஏவம் குழுவினரை உதவி ஆணையரைச் சந்திக்க அழைத்தபோது, குழுவை நடத்துபவர்களான சுனில் விஷ்னுவும் கார்த்திக் குமாரும் வராமல், வேறு இரண்டு ”முஸ்லிம்களை” அனுப்பினர்.

 

அவர்கள், “இந்நாடகம் முஸ்லிம்களின் பன்முகத்தன்மையைக் காட்டுவதாகவும், பாகப்பிரிவினைக்குப் பிறகுள்ள இந்தியாவில் முஸ்லிம்கள் சந்திக்கும் பிரச்சனைகளைக் காட்டுவதாகவும் தயாரிக்கப்பட்டுள்ளது” என்று கூறினர். எதிர் தரப்பினர் நாடகத்தில் வருகின்ற தேச விரோத காட்சிகளையும் வசனங்களையும் சுட்டிக் காட்டியபொழுது, “சில காட்சிகளும் வசனங்களும் அவ்வாறு இருக்கலாம். ஆனால் எங்களுக்குக் கருத்துச் சுதந்திரம் பேச்சுச் சுதந்திரத்தின் அடிப்படையில் அனுமதி தரவேண்டும்” என்று விவாதம் செய்தனர்.

 

 Karuthu-Suthanthira-Porvaiyil-Dhesa-Virotha-Natakam-2

அதனைத் தொடர்ந்து அவர்கள் மூவரும் சென்னை மாநகராட்சி ஆணையரின் செயலரையும் சந்தித்துப் புகார் மனுவை அளித்தனர். பாரளுமன்றத் தேர்தல் அறிவிப்புக்குப் பிறகு தேர்தல் நடந்து முடியும்வரை மாநகராட்சி ஆணையரும் சட்டம் ஒழுங்குக்குப் பொறுப்பேற்கிறார் என்பதால் அவரிடமும் மனு அளிக்கப்பட்டது. மேலும் தமிழகத் தலைமைச் செயலாளர், உள்துறைச் செயலாளர், சென்னை மாவட்ட ஆட்சியர், தமிழக காவல்துறை டைரக்டர் ஜெனரல் ஆகியோருக்கும் மின் அஞ்சல் மூலம் புகார் அளித்தனர்.

 

பிறகு நாடகத்தின் தேச விரோதப் போக்கையும், விஷயத்தின் தீவிரத்தையும் கவனத்தில் கொண்ட நகரக் காவல்துறை ஆணையர் நாடகத்திற்குத் தடை விதித்து ”Alliance Francais” அமைப்பினருக்கு நாடகத்தை அரங்கேற்ற வேண்டாமென்று அறிவுறுத்தினார்.

 

வேடதாரி ஊடகங்கள்

இந்தத் தடையைப் பற்றிச் செய்தி வெளியிட்ட டைம்ஸ் ஆஃப் இந்தியா (Times of India) மற்றும் தி ஹிந்து (The Hindu) நாளிதழ்கள், சென்னைக் காவல்துறை கருத்துச் சுதந்திரத்திற்கு எதிரானவர்கள் என்பது போலச் செய்தி வெளியிட்டனர். ஏவம் நாடகக் குழுவின் கார்த்திக் குமாரின் கருத்தை மட்டும் வெளியிட்டனர். நாடகத்திற்கு எதிராகப் புகார் அளித்தவர்களின் கருத்தைக் கேட்டு வெளியிடவேண்டும் என்கிற தார்மீகப் பொறுப்பும், பத்திரிகை தர்மமும் இன்றி நடந்து கொண்டன.

 

மேலும் கார்த்திக் குமார், நாடகத்தின் எழுத்துப் பிரதியை காவல்துறை ஆணையரிடம் கொடுத்ததாகவும் அதைப் படித்த பிறகுதான் அவர் அனுமதி அளித்தார் என்றும் பொய் கூறியுள்ளார். உண்மையில் அவ்வாறு அவர் எழுத்துப்பிரதியைக் கொடுக்கவேயில்லை.

 

மீண்டும் பெங்களூருவில் நடந்த முயற்சி முறியடிப்பு

 Karuthu-Suthanthira-Porvaiyil-Dhesa-Virotha-Natakam-8

ஏற்கனவே ஒரு முறை பெங்களூருவில் இந்நாடகத்தை அரங்கேற்றிவிட்ட நம்பிக்கையில், மீண்டும் அங்கே நடத்த ஏற்பாடு செய்திருந்தனர். இம்மாதம் 12-ம் தேதியிலிருந்து 16-ம் தேதிவரை ஜாக்ருதி அரங்கில் ஏற்பாடு செய்திருந்தனர். ஹிந்து ஜனஜாக்ருதி சமிதி அமைப்பினர் இம்முறையும் மாநகரக் காவல் ஆணையர் அவர்களைத் தொடர்பு கொண்டு மனு அளித்தனர். இம்முறை பெங்களூரு மாநகரக் காவல்துறை ஆணையர் நாடகத்தின் தேச விரோதத் தன்மையையும் எதிர்ப்பாளர்களின் மனவுணர்வையும் விஷயத்தின் தீவிரத்தையும் தெளிவாகப் புரிந்துகொண்டு நாடகத்திற்குத் தடை விதித்தார். ஜாக்ருதி அரங்கம் ஆணையரின் அறிவுறுத்தலை ஏற்று நாடக அரங்கேற்றத்தை ரத்து செய்தது.

 

மக்கள் விழிப்புணர்வு அவசியம்

இன்றைய இந்தியாவில் அன்னிய சக்திகள் பலவிதங்களில் இயங்கிக் கொண்டிருக்கின்றன. மதச்சார்பின்மை, மனித உரிமை, கருத்துச் சுதந்திரம், பன்முகக் கலாச்சாரம் போன்ற போர்வைகளில் அன்னிய நிதியுதவியுடன் இயங்கும் பல அமைப்புகளும் என்.ஜி.ஓக்களும் நமது நாட்டின் ஸ்திரத்தன்மையை அழித்து இறையாண்மைக்கும் ஒருமைப்பாட்டுக்கும் ஊறு விளைவிக்கும் நோக்கத்துடன் பிரிவினைவாதத்தையும், மதமாற்றத்தையும், தீவிரவாதத்தையும் வளர்த்து வருகின்றன. அதற்கு இம்மாதிரியான நாடகக் குழுக்களையும், அவர்களுக்கு நிதியுதவி செய்வதன் மூலம் பயன்படுத்திக்கொள்கின்றன. இவற்றையெல்லாம் பொது மக்கள் கூர்ந்து கவனித்து ஜனநாயக முறையில் போராடி வெற்றி பெறவேண்டும்.

 

நமது நாட்டின் இறையாண்மையையும், ஒருமைப்பாட்டையும் காப்பது நம் அனைவரின் கடமையாகும்.

Read 1850 times
Rate this item
(0 votes)
Last modified on Tuesday, 15 March 2016 17:23

Email This email address is being protected from spambots. You need JavaScript enabled to view it.

1 comment

  • Comment Link p.s.subramanian Saturday, 15 March 2014 17:04 posted by p.s.subramanian

    Haran Anna, Ok you are younger to me- Haran Tambi great article. Hope lot of people read this and appriciate and act.

Leave a comment